Castrillón va ampliar la mina d'Arnáu pa que puea haber más visites y con mayor comodidá

Trabayar a contra reló por cuenta d'un retrasu na confirmación de les ayudes europees

El proyectu presentáu pa l'ampliación de la Mina d’Arnáu contempla l'apertura de nueves galeríes, con un percorríu de cerca de 63 metros de llargor unu y otru de 120 metros, amás de crear una tienda y una cafetería.

Según espliquen, trabayen a contra reló pol retrasu de la subvención europea concedida al traviés del Ministeriu d'Industria y Turismu de más de dos millones d'euros. Una vegada que se llicite’l proyectu, va tener que tar llistu'l 60% de la so execución pa marzu de 2026.

El Muséu d’Arnáu, representativu de la cultura minera de la contorna, abrió les sos puertes fai 11 años, y dende entós la so crecedera ye esponencial. L'añu pasáu recibió cerca de 6.000 visitantes.