Cascos nun foi al so xuiciu al sentise indispuestu enantes de la vista

Ex-cargos de Foro conocíen gastos de Cascos y la esistencia d'una sede en Madrid

La cuarta sesión del xuiciu que se sigue na sección tercera de l’Audiencia Provincial d'Uviéu escontra l’ex-presidente del Principáu y ex-vicepresidente del Gobiernu, Francisco Álvarez-Cascos, volvió a entamar esta mañana cola declaración de dalgunos de los testigos citaos pola defensa, pero ensin la presencia del acusáu na sala.

Tres ser esamináu pol médicu-forense, y a propuesta del so abogáu defensor, Luis Tuero, cola conformidá del fiscal y de l'acusación particular, el tribunal presidíu por Javier Domínguez Begega alcordó siguir col xuiciu ensin cuntar cola presencia física del ex-líder de Foro.

El so abogáu afitara al entamu de la sesión qu'Álvarez Cascos ta sometiéndose a diálisis peritonial, que pasara una mala nueche, con voltures y mareos y que, anque fuera al Palaciu de Xusticia, nun se vía en condiciones de poder aguantar la sesión.