Cuasi la metá de los casos de tuberculosis en xabalinos diose na contorna veterinaria de Parres-Piloña

La tresmisión de la enfermedá domina ente bovinos y espárdese per ganaderíes nel conceyu de Tinéu

Cuasi la metá de los casos positivos de tuberculosis en xabalinos dase na contorna veterinaria de Parres-Piloña: siete d'un total de 15 en toa Asturies. Esto lleva a pensar a los técnicos que ye'l xabalín el principal tresmisor de la enfermedá n'El Sueve. Mientres qu’en Tinéu, la forma d'andada ye estremada.

En Parres, los técnicos consideren que la enfermedá ta cronificada. La Conseyería aplica midíes de distinta intensidá dende 2015. Nel conxuntu d'Asturies, ente 2022 y 2024, rexistráronse 34 focos de tuberculosis bovina y la forma d'andada ta más equilibrada.

Pa caltenese como zona llibre de la enfermedá, la campaña de saniamientu ganaderu d'anguaño esixe que se faiga un muestréu a la metá de les ganaderíes de toa Asturies. Y a la totalidá de los conceyos y esplotaciones de riesgu. Amás, chequeará a los animales que vengan de provincies con una prevalencia de la tuberculosis superior al 1%.