Voladura controlada de la nave de tolves na central térmica de Soutu

Los trabayos d'esmantelamientu tán executaos al 87%

En Tinéu llévabase alantre la voladura controlada de la nave de tolves del grupu dempués de la central térmica de Soutu, la última de les voladures previstes na fase d’esmantelamientu, qu’entra na so recta final, colos trabayos yá executaos al 87%.

A les 11:00 en puntu de la mañana entamaba la cuenta atrás y en malapenes unos segundos cayía la nave de tolves de carbón del grupu 3. Un edificiu, con estructura de formigón armao, con una altura de cuasi 44 metros, una de les poques estructuras grandes que quedaben en pie.

Ye la última voladura prevista na central térmica del Narcea, en Soutu, cola que los trabayos d’esmantelamientu tán executaos al 87%. Entra, poro, na so recta final, ensin que na zona se vean alternatives de futuru.

Dempués de la voladura entamen los trabayos pa quitar el material. Piénsase que se tendrán que procesar y clasificar 1.100 tonelaes de metal y 2.600 de formigón.

Anque menos que n’otres vegaes, la demolición volvió a axuntar na zona a vecinos y curiosos. Dalgunos tuvieron en dellos de los esbarrumbes y señalen lo impresionante del momentu de la detonación.

La voladura, a pie de carretera, obligó una vegada más a zarrar al tráficu de l’As-15. El corte allargóse más de media hora y, una vegada llimpia la vía, pasaes les 11:30, quedaba restablecida la circulación.