Lluz verde pa la construcción d'un área d'autocaravanes en Salinas

El proyectu plantega la construcción d'una superficie de 3.311 metros cuadraos

El Boletín Oficial del Principáu d’Asturies (BOPA) asoleyó l’informe d’impactu ambiental pal desendolcu del proyectu d’un área d’autocaravanes na avenida de Raíces de Salinas, Castrillón, nel que s’afita qu’esta actuación nun tien efectos significativos sobre’l mediu ambiente.

L’Ayuntamientu de Castrillón contactó col promotor de la iniciativa, Apartamentos El Lerele, pa solicitar l’unviu de la documentación afayadiza.

Una vegada que’l promotor faga los cambeos indicaos nel informe d’impactu ambiental y proceda al pagu de la tasa podrá solicitar la llicencia pa entamar la construcción, informó l’Ayuntamientu nuna nota.

L’oxetu del proyectu ye la instalación d’un área d’aparcaderu p’autocaravanes en tránsitu na contornada de la playa de L’Espartal, con capacidá pa 50 d’estos vehículos.

El proyectu plantega la construcción d’una zona d’aparcaderu con una superficie de 3.311 metros cuadraos y 212 metros cuadraos más pa edificaciones de recepción, llavandería, almacén, oficines, aseos y baños y un quioscu.