El PP responsabiliza al Principáu y el Simpa pide actualizar el proyectu del Hospital de Cabueñes

La diputada rexonal y vocera de sanidá del PP, Pilar Fernández Pardo, considera que la paralización de les obres de reforma y ampliación del Hospital de Cabueñes, en Xixón, forma parte de la marca de la casa del Gobiernu de Barbón, que se caracteriza por repitir nes distintes empreses, entes y fundaciones que xestiona “la incompetencia, la parálisis y la irresponsabilidá".

Tres recordar que'l proyectu surdió va diez años, que se llicitó per primer vegada en 2021 por 49,9 millones y que, al quedar ermu, volvió a llicitase y a axudicase un añu dempués por 79 millones d'euros, Fernández Pardo afirmó que tol procesu ta "enllenu d'incidencies y irregularidaes".

Según la diputada popular, la Sindicatura de Cuentes yá sollertó en febreru del pasáu añu que la mayoría de los criterios d'axudicación de la obra taben sometíos a “xuicios de valir”, lo que traxo l'informe desfavoratible de los servicios xurídicos, y que nun se recoyía la forma en que l'alministración verificaría'l cumplimientu de la ufierta.