L'añu pasáu rexistráronse n'Uviéu cien atropellos que dexaron dos muertos

La Policía Local d'Uviéu unvió güei al xulgáu l'informe del atropellu de tres menores del vienres na cai Padre Vinjoy

La Policía Local d’Uviéu unvió güei al xulgáu l’informe del atropellu de tres menores del vienres na cai Padre Vinjoy.

L’añu pasáu hubo n’Uviéu un centenar d’atropellos a peatones, que dexaron 62 mancaos leves y 23 graves. Fueron seis menos que l’añu anterior, 2023, onde hubo 106 atropellos, 77 d’ellos con mancaos leves y 11 graves. Medraron, eso sí, los muertos: dos en 2024 por una única víctima en 2023, apunta Víctor Menéndez, Subinspector coordinador d’Atestaos de la Policía Local d’Uviéu.

Nun hai, diz la Policía Local, nengún puntu negru n’Uviéu onde haya más accidentes que n’otres zones de la ciudá. Sicasí, sí hai un mes concretu más propensu a accidentes d’esti tipu: el mes de xineru.

Evitar distracciones al volante, medrar l’atención en díes de lluvia, respetar les señales semafóriques y los pasos de peatones son les principales recomendaciones pa conductores y viandantes señala José Ramón Prado, conceyal de Seguridá Ciudadana d’Uviéu.

No que llevamos de 2025, Uviéu contabiliza yá una víctima mortal por atropellu’l día de Reis en Llamaquique.