Uviéu tien pidimientos de 24 empreses pa instalase na antigua galería comercial del Calatrava

L'Ayuntamientu d'Uviéu ta interesáu nes empreses qu'aspiren a xenerar trabayu y dinamizar la zona

L’Ayuntamientu d’Uviéu recibió pidimientos d’unes 24 empreses pa instalase na antigua galería comercial del Calatrava y estudien la fórmula d’arrendamientu pa que puean facelo esti mesmu añu.

El conceyal d’Infraestructures y teniente d’alcalde d’Uviéu, Ignacio Cuesta ta convencíu de qu’esti añu verá les primeres empreses instalaes na iantigua galería comercial del Calatrava y amiesta que tán sobre manera interesaos naquelles qu’aspiren a xenerar trabayu y dinamizar la zona.

Enagora 24 empreses, dalgunes mui conocíes, asegura Cuesta, amosaron el so interés por instalase nun edificiu que yá visitaron. Una d’elles quier ocupar una planta entera. Ye de primer llinia, diz Ignacio Cuesta y nun ye asturiana.

Lo que sí se comprometen dende l’Ayuntamientu d’Uviéu ye a cumplir l’alcuerdu algamáu con Ix-Convocatoria por Uviéu y destinar una parte de los 45.000 metros a equipamientu públicu.