L'Agostiellu asume los llabores d'una asociación comercial pa suplir una falta en Piloña

Una particularidá cola qu'algamen dinamizar a les pequeñes tiendes con eventos y promociones

Por mor de la falta d’una agrupación de comerciantes en Piloña y a pidimientu del consistoriu, l’asociación cultural de L’Agostiellu asume también el llabor d’una comercial. Una particularidá que respuende a una necesidá de los pequeños negocios, señala Conchi García, presidenta de L’Agostiellu.

Enagora tán en plena campaña de socios, de los qu’acumulen 140 individuales y cuasi 60 comerciales. Los sos apurrimientos úsense pa facer sorteos, descuentos y actividaes que son fundamentales pa medrar les ventes. Gracies a les promociones algamen mover cerca de 5.000 euros adicionales al añu.

L’ayalga de la corona ye’l mercáu de L’Agostiellu los xueves d’agostu, qu’esti últimu añu foi la sensación y arrasó colos datos de públicu y ventes.