Tinéu celebra la Feria del Perru con más de 60 exemplares de mastín y cuasi 30 de sabuesu español

El sabuesu español, la única raza d'España reconocida como de rastrexu, podría desapaecer

El mastín español ye ún de los meyores aliaos pa caltener l’equilibriu ente la fauna xabaz y el cuidáu y defensa del ganáu. Una idea que comparten la Conseyería de Mediu Rural y les asociaciones de criadores que trabayen a comuña pa fomentar la so utilización con esti envís, al traviés d’ayudes y formación nel so manexu asegura Rocío Huerta, directora xeneral de Ganadería.

Ente los requisitos pa optar a les ayudes tán l’acreitar que ye mastín español, una raza, puntualicen, non agresiva, que defende’l ganáu ensin torgar otres actividaes como’l turismu o’l senderismu señala Ramón García, presidente de l’Asociación Asturiana de Mastín Español (Asame).

Les ayudes son pa la compra d’exemplares y pa la manutención nel primer añu.

El sestu concursu monográficu de mastín español axunta en Tinéu a más de 60 exemplares llegaos de toa Asturies, Galicia, Cantabria, País Vascu, Castiella y Lleón y Estremadura. La otra raza protagonista güei ye’l sabuesu español, col segundu concursu nacional qu’axunta a más d’una trentena de participantes.

El sabuesu español ye la única raza reconocida n’España como perru de rastrexu, pero los criadores alerten de que podría llegar a desapaecer, con namás unos 200 exemplares acreitaos y piden más ayudes pal so espardimientu destaca Rubén Rubio, presidente de l’Asociación Nacional de Sabuesu Español.

La Feria del Perru sigue mañana colos concursos pa perros con y ensin pedigrí.