Activáu'l plan de viabilidá ivernal en Payares y El Güerna

La cota de nieve baxó a partir de mediudía hasta los 700 metros nel Cordal y los Picos d'Europa

La Delegación del Gobiernu n'Asturies activó esti xueves la fase d'alerta del plan de viabilidá ivernal nel puertu de Payares (N-630) y na AP-66, ente Asturies y Lleón, nuna xornada na que l'Axencia Estatal de Meteoroloxía (Aemet) prevé que la cota de nieve baxe a partir de mediudía hasta los 700 metros nel Cordal y nos Picos d'Europa.

El Cordal y los Picos d'Europa van tar dende les 12:00 y tola xornada del vienres n'avisu mariellu por nevaes que van dexar espesures d'unos diez centímetros de nieve.

La fase d'alerta del plan de viabilidá iverniza supon l'espliegue y movilización de les máquines quitanieve y esparcidores de fundente pa que puean ser uses cuando seya necesario.

Nel puertu de Payares hai disponibles seis camiones quitanieve con GPS, una turbofresadora dinámica quitanieve, una pala cargadora, 1.500 tonelaes de fundente y 10.000 llitros de salmoria.

Al respective de l'autopista AP-66, la concesionaria Aucalsa tien pa les vertientes asturiana y lleonesa de l'autopista catorce quitanieve, una máquina quitanieve dinámica, tres pales cargadores de fundente, 5.635 tonelaes de fundente y 300.000 llitros de salmoria.

En total, na rede de carreteres del Estáu n'Asturies hai disponibles 53 máquines quitanieve, depósitos p'almacenar 498.000 llitros de salmoria y silos con 9.915 tonelaes de fundente.