Asturies rexistra les temperatures mínimes más baxes del país, con 9,6 graos baxo cero

Nevaes en cotes baxes nun fin de selmana ivernizu, pero con menos lluvia

Asturies rexistró la pasada nueche la temperatura más baxa del país, con 9,6 graos baxo cero en Vega d’Urriellu, en Picos d'Europa, según los datos espublizaos pola Axencia Estatal de Meteoroloxía (Aemet) na so páxina web.

Amás, rexistráronse -6,9 graos en Vega d'Ariu, tamién Picos d'Europa; -4,5 en Braña / L.leitariegos; -4,3 en Payares, y -4,2 en Sotres.

L’Aemet prevé qu'esti vienres les temperatures mínimes vayan en llixeru descensu, localmente mayor en puntos del interior, y que la cota de nieve tea nunos 600-700 metros.

L’últimu fin de selmana del iviernu n'España va dexar tiempu de plenu iviernu con temperatures fríes y xelaes y nevaes en cotes baxes (700-900 metros), enantes de dar pasu a una selmana marcada pola llegada de nueves borrasques atlántiques que van favorecer un ambiente templáu y más lluvia.