La plantiya del Tallerón ye modernamente optimista tres l'anunciu de compra por parte d'Indra

El ministru de Defensa d'Ucraína axunta con empreses españoles pa mercar material

La plantiya del Tallerón de Duro Felguera, amuésase moderadamente optimista tres l'anunciu de la compra de les instalaciones por parte d'Indra. Tán satisfechos porque se vayan caltener los 146 puestos de trabayu, pero recuerden que ye daqué qu'entá nun ta zarrao, y entá nun saben exactamente nin plazos nin los detalles del plan de la compañía.

La plantiya del Tallerón asegura que la noticia garrólos por sorpresa. Acuéyenla, dicen, con moderáu optimismu, porque anque s'anunciara, la operación entá nun se cerró, esplica Javier Rodil, presidente del comité d'empresa de Duro Felguera Calderería Pesada.

Qu'anuncien la so compra, dicen, ye una bona noticia porque Duro Felguera acaba de prorrogar el preconcursu d'acreedores y la so carga de trabayu llega hasta'l segundu semestre.

Indra comprometióse a caltener a la totalidá de la plantiya, anque cambien de sector, yá que nel Tallerón los trabayadores van pasar a dedicase a la construcción de vehículos pa los exércitos europeos.

La noticia foi mui bien acoyida na rexón y en Xixón, señalen Jesús María Pina, responsable de Relaciones Institucionales de la Delegación de Defensa n'Asturies y Jorge González-Palacios, conceyal de Relaciones Institucionales del Conceyu de Xixón.

Tres l'anunciu d'Indra nel Congresu, Duro Felguera disparóse hasta un 25% esti vienres en Bolsa. La inxeniería tien hasta'l 11 de xunu p’abordar les negociaciones coles entidaes financieres.

El ministru de Defensa d'Ucraína axunta con empreses españoles pa mercar material

El ministru de Defensa d'Ucraína, Rustem Umérov, axuntóse esti vienres con representantes de seis empreses españoles del sector pa mercar material militar tres xuntase cola so homóloga española, Margarita Robles, a la qu'agradeció'l sofitu d'España al so país pa faer frente a la invasión de Rusia.

Rustem Umérov visitó a Margarita Robles na sede del Ministeriu de Defensa, onde roblaron un alcuerdu pol que les Fuerces Armaes españoles van siguir dando sofitu na formación y ensayu de militares ucraínos. Yá se cumplió cuasi'l diez por cientu del compromisu total de formar a un total de 70.000.

Nel actu Rustem Umérov amosó'l so "agradecimientu pola asistencia en seguridá que brindó España" a los sos soldaos y aseguró qu'esti sofitu "foi de gran importancia".