Reabre Valgrande-Payares con 4 kilómetros dempués d'una temporada baxa

Los esquiadores esperen que se caltenga la bona racha

Foi una temporada complicada pa les estaciones d’esquí asturianes. La falta de ñeve impidió-yos esfrutar de les pistes como otros años y a un mes de que s’acabe esta temporada, volvió a abrir la estación de Valgrande-Payares.

Una apertura qu’aprovechen tanto aficionaos del esquí como promeses moces, nuna xornada na que’l tiempu punxo too de la so parte. La estación reabre con 3,9 kilómetros nos que se pue esfrutar d’ocho pistes y l’usu de tres remontes.

Anque vivieron una temporada baxa, entá queda esperanza, esplica Javier Martínez, director de Valgrande-Payares. Entá nun tuvieron esa gran ñevada, pero lo d’estos díes sirvió p’abrir ocho de les pistes.

Nun tuvo tanta suerte Fontes d’Iviernu, qu’enagora ta zarrada por falta de ñeve.