Les lluvies provoquen importantes daños na carretera d'accesu a Raicéu, en L.luarca

El Conceyu de Valdés va actuar d'urxencia pa evitar que los sos diez vecinos queden incomunicaos

El barriu de Raicéu, en L.luarca, cuerre'l riesgu de quedar aislláu. Les lluvies de los últimos díes degradaron inda más el terrén que soporta l'únicu vial d'accesu al pueblu. La carretera amenaza con colapsar y dexar incomunicaos a los sos diez vecinos.

L'argayu de tierra y piedres obligó a amenorgar al mínimu'l pasu nesti tramu, que presenta síntomes evidentes de fundimientu.

La situación ye tan esmolecedora que'l Conceyu de Valdés teme que, de nun actuase con urxencia, los vecinos d'esti pequeñu nuedu, próximu a L.luarca, nun van tener forma d'entrar o salir en selmanes o inclusive meses, torgando amás el tránsitu de vehículos, camiones o ambulancies.

Pa evitalo, l'arreglu va empezar a principios de selmana, señala Carlos Fernández, conceyal d'Obres Urbanes del Conceyu de Valdés.

Con un plazu d'execución averáu de dos selmanes, la obra va suponer una inversión cercana a los 65.000 euros.