Los trenes van circular en pruebes pel soterramientu de Llangréu a partir del llunes

Conceyu y Principáu avancen pa cerrar el proyectu del bulevar ente Sama y La Felguera

Les víes y la catenaria empiecen a desapaecer de la superficie de Sama y La Felguera. Operarios d’Adif avancen nel desmontaxe de la infraestructura ferroviaria con selmanes de retrasu respecto al calendariu previsto primeramente.

La llinia cerró al tráficu a finales de xineru. Dende entós los pasaxeros son tresportaos n'autobús hasta la estación d'El Berrón. La intención yera que’l corte rematara a mediaos de marzu, pero'l plazu amplióse hasta mayu.

Según fontes de los comités d'empresa del Grupu Renfe y Adif, la previsión ye que los trenes empiecen a pasar en pruebes pel tramu soterráu a partir del próximu llunes. Tamién se van facer pruebes con señales y enclavamientos mientres empieza a planiase la urbanización en superficie.

El Conceyu de Llangréu va esplicar mañana les sos aportaciones al proyectu qu'ellabora'l Principáu. Un nuevu bulevar-peatonal con carril bici que va reforzar la continuidá ente Sama y La Felguera y va meyorar la permeabilidá ente barrios.