Robláu'l conveniu pa la cesión del ala este de L'Azucarera de Pravia

L'equipamientu va agospiar el nuevu xulgáu y un semilleru d'empreses

El Conceyu de Pravia y el Principáu roblaron un conveniu de cesión per 30 años del ala este del edificiu de L'Azucarera, onde se va allugar el nuevu xulgáu, que va ocupar 1.755 metros cuadraos distribuyíos en tres plantes, y na rehabilitación van invertise 2,1 millones d'euros con un plazu d'execución de 18 meses.

El Principáu confía en retomar les obres a finales d'añu o principios del que vien dempués de más de 10 años paralizaes.

Nesti edificiu emblemáticu de finales del sieglu XIX, tamién van entamar los trabayos p'allugar un semilleru d'empreses.