Los trabayadores de la Fábrica d'Armes tienen mieu de quedar separtaos de los nuevos contratos

General Dinamics afirma que sigue comprometida en servir al Gobiernu d'España

Hai nerviosismu y esmolición ente los 900 trabayadores de la Fábrica d’Armes de Trubia. Ensin nuevos contratos nun habrá carga de trabayu abonda pa toos, creen, y ven que-yos penaliza pertenecer a l’americana General Dinamics.

Sicasí, Indra, participada pol Estáu, cree que sí se llevará los contratos españoles. Si nun compra la fábrica de Trubia, creen que podrá acabar asfixándola.

El voceru del comité d’empresa tamién opina que podrá haber fuga de trabayadores de Trubia a les nueves fábriques que planien Indra y Tess Defence. Enagora, Indra sí esplicó los sos planes a CCOO Industria pero siguen a la espera d’una xunta con General Dinamics.

El futuru, según General Dinamics, nun pasa por vender la fábrica a Indra.

Énte estes crítiques, General Dinamics respondió nun comunicáu qu’en 15 años invirtió cuasi 500 millones d’euros en Santa Bárbara Sistemas, que tien la so sede europea en Madrid y que tresferió tecnoloxía punta a les sos fábriques españoles.

Plantes, como la de Trubia, qu’evolucionaron dende lo obsoleto de va 25 años a ser instalaciones punteres a nivel internacional.

General Dinamics afirma que sigue comprometida en servir al Gobiernu d’España.