Un dron marín pa midiciones nes obres de la futura esplanada de La Ría d'Avilés

La previsión ye que los trabayos rematen el 2 de xunu

La UTE encargada de les obres de construcción de la futura esplanada de 32.570 metros cuadraos p’actividaes loxístiques na marxe derecha de La Ría d’Avilés, usa estos díes un dron marín pa facer midiciones creáu arré pa esti fin. Fáense pa comprobar l’estáu de la obra, que por mor del pocu caláu en dalgunes parte de la ría, nun se podíen facer d’otra forma.

La midición del dron dexa conocer con precisión de centímetros l’estáu de la obra. Los datos que recueye tresfórmense en semeyes en 3D onde se puen ver dende les capes más fonderes, onde hai agua, hasta les más superficiales. Asina pue comprobase l’estáu de los argayos o del asentamientu del rellenu, que forma la esplanada pal almacenamientu de mercancíes portuaries de gran tonelaxe.

El dron construyólu la UTE encargada de l’actuación, específicamente pa esti proyectu. El pocu caláu, en dalgunes partes cercanes a la obra, impidió facer estes midiciones con barcu.

Los trabayos tán fechos al 75%, falta xubir un metru la cota de la esplanada, y facer el drenaxe pa que l’agua acumulao na cuenca cercana salga a la ría, cruzando la esplanada.

La previsión ye que la obra remate’l 2 de xunu.