El policía nacional acusáu d'estafa asegura que foi un negociu que salió mal

El xuiciu quedó vistu pa sentencia

Na so declaración énte'l tribunal, l'acusáu, policía nacional en Llangréu, asegura que nun pidió los préstamos p’arriquecese sinón pa impulsar una empresa de vending que tenía. Y que'l negociu fracasó, ente otres coses, diz, pola COVID-19. Nel so derechu a la última palabra afitó que la so intención ye volver los 250 mil euros cuando puea y que nun actuó, señala, de mala fe.

Daqué que nun comparte l'acusación particular. Afita que s'aprovechó de la so condición de policía pa engañar a la familia que-y emprestó'l dineru y denuncia que se roblaron contratos cuando yá yera consciente de que nun diba tener capacidá de volver el dineru apunta Cristina Fernández, abogada de l'acusación particular.

Según l'acusáu, los préstamos fixéronse porque suponíen beneficios pa les dos partes: pa los inversores porque recibíen una mayor rentabilidá pol dineru emprestáu, y pa él porque pagaba menos intereses al bancu. L'acusación particular afita que los préstamos nun fueron usaos pa invertir na empresa, fala d'engañu y pide seis años de prisión pal policía. La defensa, pide la llibre absolución y la fiscalía, que nun acusa, pide'l sobreseimientu.

El xuiciu, que quedó vistu pa sentencia, foi siguíu por otres cinco persones qu'acusen a esti mesmu policía d'estafa n'otros procedimientos.