El Principáu trabaya nun proyectu pa meyorar la inclusión educativa de 3.000 estudiantes con TEA

La estratexa contempla patios dinámicos pa fomentar la participación de tol alumnáu nos recreos

El plan que prepara Asturies pa beneficiar a los 2.800 alumnos qu'hai na rexón con TEA inclúi midíes rellacionaes con accesibilidá y espacios, campañes de sensibilización, refuerzu de personal especialista y formación al profesoráu.

Nesi proyectu tendría muncha importancia'l tresformamientu de los patios en colexos o institutos, que la mayoría de les veces nun favorecen la inclusión d'esti colectivu nos recreos.

D'ello faló esta mañana en Tapia nunes xornaes entamaes por Edes la terapeuta asturiana Gey Lagar, la impulsora d'esi tresformamientu de los patios tradicionales n'otros inclusivos. Apostar por nuevos xuegos, por otres ferramientes que dexen integrar non solo a alumnos con trestornu del espectru autista, sinón tamién a otros que puean tar más aisllaos o en riesgu d'acosu escolar.

Yá hai munchos colexos n'Asturies que cunten con esti tipu de patios inclusivos, otros introducen dellos elementos qu'ayuden a meyorar el día ente día d'estos estudiantes. Son elementos que nun trai un gran desembolsu económicu pa los centros.

La primera de les midíes d'esa estratexa que prepara'l Principáu va ser escoyer dellos centros de Primaria y Secundaria pa invertir n'accesibilidá cognitiva, sensorial y emocional.