Mediu millar de persones esixen un parque na zona este d'Uviéu

Reclamen la construcción d'un gran espaciu verde n'El Rayu-Mercadín

Más de mediu millar de persones marcharon esta mañana n’Uviéu nuna manifestación cola que reclamen la construcción d’un gran espaciu verde na zona d’El Rayu-Mercadín. Vecinos sobre manera de Ventanielles, La Tenderina, Cerdeño o Fozaneldi.

Afirmen que sedría’l primer parque del Este d’Uviéu, una reivindicación histórica que, amás, quier acabar cola degradación que presenta dende va años esa zona d’El Rayu.

Con pancartes, pitos y turuyes, y faciendo frente a la lluvia, marcharon dende la rotonda de Cerdeño hasta la ilesia de San Francisco Javier.

Los grupos municipales de PSOE y Izquierda Xunida xuniéronse a la manifestación.

Nel últimu plenu municipal, l’Ayuntamientu aprobó dar forma al proyectu del parque, pero los vecinos piden rapidez y fechos concretos.