Pumariega Gestión va abrir una llinia de trituráu en Porceyo

Cápsules de café convertíes en moblame urbanu y materiales pa la construcción

España ye'l tercer consumidor del mundu de cápsules de café tres Estaos Xuníos y Italia. Al añu, refúguense siete mil millones d'estos envases, 14.000 al minutu. Si se punxeren en filera daríen 14 vueltes al mundu. Reciclaes afechiscamente nel contenedor mariellu puen tener una nueva vida. Los restos de café sirven pa compostaxe y les cápsules d’aluminiu conviértense en nueves pieces na fundición. Les de plásticu suponen un retu.

Un exemplu de cómo aprovechales tiénenlu na empresa Pumariega Gestión, que va abrir en Xixón una llinia de reciclaxe pa convertiles en moblame urbanu y materiales pa la construcción.

Un bancu en Castropol yá ta fechu coles cápsules de café reciclaes polos vecinos. Ye unu de los 15 destinaos a conceyos y fabricaos dientro del programa d'economía circular 'Second life coffe', un proyectu que Pumariega Gestión punxo en marcha va tres años en collaboración con una empresa navarra y la Fundación Alimerka.

La nueva llinia de trituráu ta llista p'arrancar a la espera del últimu trámite ambiental. Va emplegar a miembros de l'Asociación Asturiana de Síndrome de Down. L'oxetivu ye allugar equí'l procesu completu. En paralelo, busquen nueves soluciones pa les sobres de café.

Pumariega prevé recoyer anguaño 48 tonelaes de cápsules de café y hai marxe pa crecer, porque creen qu'esa cifra supón menos del 15% de lo que se podría.