El Gobiernu piensa tener preparada la nueva Llei de Facienda nel últimu trimestre

Ún de los oxetivos ye meyorar la execución de los presupuestos

El conseyeru de Facienda, Xusticia y Asuntos Europeos, Guillermo Peláez, aseguró esti llunes que’l Gobiernu asturianu nun se conforma cola execución de cuasi’l 90 por cientu algamada l’añu pasáu na partida d’ingresos y gastos de los presupuestos del Principáu y qu’aspiren a meyorala n’exercicios vinientes, daqué no que sedrá fundamental la nueva Llei de Facienda.

Peláez adelantó que ye intención del Executivu tener preparáu esti proyectu de llei aprobáu nel últimu trimestre del añu pa que se puea dar treslláu al parlamentu asturianu, pero qu’hai que tener en cuenta que ye una normativa "técnica y difícil" na que lo más importante ye que tenga "vocación de permanencia".

El conseyeru compareció esti llunes énte la Xunta Xeneral del Principáu pa informar sobre la execución presupuestaria del añu pasáu, nel que los ingresos reconocíos xubieron 5.837 millones euros, un 89,12 por cientu de los presupuestaos, y los gastos a 5.880 millones, el 89,85 por cientu del total.