Detectades en Xixón 22 ocupaciones irregulares de viviendes públiques

Ye una pequeña parte de les 2.057 viviendes públiques qu'hai en Xixón

La Conseyería d’Ordenación del Territoriu, Urbanismu, Vivienda y Derechos Ciudadanos detectó l’añu pasáu en Xixón 22 viviendes públiques que taben ocupaes de forma irregular polo que s’entamaron yá los trámites xudiciales afayadizos pa solventar esa situación.

En concreto, según los datos apurríos pol conseyeru de Vivienda nuna comparecencia nel parllamentu autonómicu, dempués de 639 inspecciones feches dende xineru de 2024 afitóse que 13 taben ocupaes irregularmente "polo que podría haber arriendos o cesiones non consentíes" y qu’otres nueve taben vacíes, a pesar d’haber un contratu vixente.

Ye una pequeña parte de les 2.057 viviendes públiques qu’hai en Xixón -1.765 del Principáu y 292 de la empresa pública Vipasa- de les que tán ocupaes 2.015.