El Sepepa defende averar la ufierta formativa a la demanda de los sectores empresariales

Seis de cada diez desempleaos que reciben formación nel Sepepa alcuentren trabayu

El Serviciu Públicu d’Empléu del Principáu (Sepepa) defende averar la ufierta formativa a la demanda de los sectores empresariales, según s’apuntó esti martes nel alcuentru nacional d’Uviéu de responsables del Serviciu d’Empléu Estatal y de los organismos con competencies en polítiques actives de trabayu de toles comunidaes autónomes p’analizar estratexes y casos de bones práctiques.

Los servicios públicos d’empléu de toles comunidaes y el Serviciu d’Empléu Estatal (SEPE) coinciden na necesidá d’estrechar les acciones d’intermediación cola empresa pa meyorar la empleabilidá, inxertar les nueves tecnoloxíes y afondar na evaluación de les polítiques de trabayu.

La primer xornada del alcuentru nacional sobre bones práctiques d’estos servicios punxo’l focu na importancia de la formación, qu’algama medrar nun 30% les posibilidaes d’alcontrar un trabayu.