El Sespa anima a los profesionales de la salú a denunciar cuando seyan afrellaos

Presentáu l'Observatoriu d'Agresiones a Profesionales del Serviciu de Salú

El xerente del Sespa, Aquilino Alonso, animó esti martes a los profesionales del serviciu de salú que sufran agresiones a que presenten denuncia cuando seyan víctimes.

De les 365 comunicaciones treslladaes el pasáu añu por agresiones físiques, verbales, coacciones o amenaces, namás 21 derivaron en denuncies.

El xerente del Sespa, Aquilino Alonso, presentó esti martes l'Observatoriu d'Agresiones a Profesionales del Serviciu Salú a los equipos directivos de les árees sanitaries. Ente los oxetivos ta avanzar pa tratar d'amenorgar a cero esti tipu de comportamientos.

Alonso avanzó que l'observatoriu va quedar constituyíu "dientro d'unos díes" y va ser “un pasu más" hacia'l problema qu'esmolez al Sespa y a la Conseyería de Salú poles agresiones a profesionales, nes qu'amás dase un “sesgu de xéneru importante", yá que más d'ocho de cada diez fueron muyeres afrellaes, a manes de los homes nun 60 per cientu de los casos.