La nueva ampliación de Cabueñes va sumar una planta más de 3.000 metros cuadraos

Primer xunta de la comisión de siguimientu de les obres del centru

La conseyera de Salú del Principáu, Concepción Saavedra, anunció esti martes que'l nuevu proyectu d'ampliación del Hospital Universitariu de Cabueñes va sumar una planta más de cuasi 3.000 metros cuadraos de superficie, amás de les zones grises de llaboratoriu, farmacia, esterilización y hemodiálisis, que nun taben previstes nel anterior.

Saavedra fixo esti anunciu na primer xunta de la comisión de siguimientu de les obres del centru de referencia del área V, celebrada en Xixón, onde tamién avanzó que’l so departamentu trabaya de forma coordinada cola xerencia pa definir los usos de la nueva planta hospitalaria.

La conseyera de Salú esplicó que l'actividá de Cabueñes "va siguir creciendo", polo que ye necesario ampliar espacios y "pensar nun hospital de futuru", polo que, con una planta más, va ser posible reasitiar árees "y cumplir coles mires de los profesionales".