Zapico pide a Xixón que dexe de mariar cola declaración de zones tensionaes

Na Xunta la oposición dixo que topar el preciu empeorará'l problema de la vivienda

El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, pidió esti martes al Ayuntamientu de Xixón que dexe de mariar cola declaración de los barrios de L’Arena y Cimavilla como zones de mercáu residencial tensionáu, anque tamién tendió la mano a la so alcaldesa, Carmen Moriyón, p’afitar midíes correctores a la hora de topar precios d’alquiler.

"Nun me mareen, que yá somos toos mayorinos", afirmó’l titular de Vivienda, qu’insistió tamién en que "nunca" se negó a negociar cola alcaldesa al comparecer esti martes nel parllamentu asturianu pa informar sobre les polítiques públiques que’l so departamentu lleva alantre en Xixón.

Zapico falaba asina del fechu de que l’añu pasáu l’Ayuntamientu de Xixón aprobare una resolución, cola abstención del PP y Foro, y l’únicu votu a la escontra de la edil de Vox, na que se pidía a la conseyería qu’entamare los trabayos pa declarar L’Arena y Cimavilla como zones tensionaes, y que’l 12 de marzu pasáu s’aprobare otra na que-y pidíen que nun se llevare alantre ensin qu’hubiere un alcuerdu enantes.