Cúmplense dos años del incendiu de Foyéu, qu'arrasó 20.000 hectárees n'Asturies

Repoblaes 1.000 hectárees afectaes polos incendios

Cúmplense dos años del entamu del incendiu de Foyéu, qu’arrasó en tres díes miles d’hectárees. L’incendiu dexó en Tinéu y Valdés pérdides millonaries. Foi’l más grave d’una fola que dexó arrasaes n’Asturies unes 20.000 hectárees, d’elles 10.000 taben llantaes.

Dos años dempués pudieron repoblase menos de 1.000 hectárees, esplica Luís Enrique García, de 'Maderas García Hermanos' de Cadavéu.

Pal Principáu esa repoblación entra dientro de lo previsto, inclusive ta penriba de lo avezao. A eses hectárees repoblaes hai que sumar unes 3.500 adicionales que puen tar recuperaes por sí mesmes nunos tres años, esplica Javier Vigil, director xeneral de Xestión Forestal

El Principáu trabaya en delles zones pa fomentar esa repoblación. Dalgunes yá tán preparaes, como una n’El Val.le Paredes, onde se convirtió una zona quemada nun pastizal que puen aprovechar los ganaderos. Tamién hai otres privaes y más polémiques, como la d’una firma venceyada con una papelera portuguesa que quier llantar 50.000 ocalitos nun tarrén de Valdés afectáu poles llaparaes y onde enantes había pinos.

Lo peor agora son los cientos d’hectárees qu’entá siguen teniendo madera quemao. Cuesta muncho quitalo de los montes y eso representa un gran problema, esplica Luis Enrique García.

La intención del Principáu ye siguir convocando ayudes a particulares pa repoblar 500 hectárees al añu.