Economistes avisen de que la vía fiscal asturiana tien una incidencia mínima

Asturies ye una de les comunidaes más cares pa les rentes altes

L'últimu informe sobro fiscalidá autonómica ellaboráu pol Conseyu Xeneral d'Economistes Asesores Fiscales reflexa que, anque en "Asturies hai un númberu ampliu de bonificaciones" qu’igüen la llamada vía fiscal asturiana, "l'efectu que tienen sobro los contribuyentes ye mínimu yá qu’afecta a un númberu mui amenorgáu".

Por eso, el decanu del Colexu d'Economistes d'Asturies, Abel Fernández, considera que na reforma del IRPF na que'l Gobiernu asturianu asegura tar trabayando p'amenorgar la presión fiscal sedría preferible que s'inclinara por amenorgar los tipos que s'apliquen a siguir aumentando les deducciones pa retocar esti impuestu.

"La dulda ta en cómo se va a llevar a efectu porque equí fálase de la vía fiscal asturiana, que nun acabamos d'entender perbién", amestó al señalar que paez que'l Gobiernu va inclinase por siguir con más deducciones y que, seya como fuere, l'anunciu de la reforma ye positivu.

Nun momentu nel que l'alderique sobre una reforma fiscal garró fuerza nel Principáu énte la decisión del gobiernu catalán d'amenorgar del 10,5 al 9,5 por cientu el tipu a aplicar nos tramos más baxos del IRPF, Fernández afitó que n'Asturies llexíslase muncho pero “dacuando'l beneficiu ye escasu" porque los requisitos que s'establecen dacuando son difíciles de consiguir o van empobinaos a mui poca xente.

Eso sí, Asturies caltiénse como la comunidá na que más paguen les rentes más altes y como la más cara pa los contribuyentes del tramu más baxu del IRPF, polo que "sigue siendo una de les comunidaes con mayor presión fiscal d'España", aseguró al presentar les conclusiones del estudio 'Panorama de la Fiscalidad Autonómica’.