Roqueñí afirma qu'El Musel trabaya pa recuperar l'Autopista del Mar con Saint Nazaire

El Musel ye'l primer cai español en tener un conveniu de conexón con Adif

La presidenta de l'Autoridá Portuaria de Xixón, Nieves Roqueñí, destacó esti xueves en Xixón el “papel protagonista" que va tener la ZALIA nel Corredor Atlánticu, al empar qu'anunció qu'El Musel yá se punxo a trabayar pa recuperar l'Autopista del Mar col cai de Saint Nazaire.

Roqueñí fixo estes declaraciones na sede de l'Autoridá Portuaria, nun alcuentru entamáu pol Ministeriu de Tresportes y Movilidá Sostenible pa presentar les últimes meyores del Corredor Atlánticu n'Asturies.

La presidenta de l'Autoridá Portuaria destacó la importancia de los puertos del Estáu nel tresporte de mercancíes, yá que per ellos pasen cerca del 60 por cientu de les esportaciones y el 85 por cientu de les importaciones d'España.

Nieves Roqueñí punxo de manifiestu'l “papel fundamental" del ferrocarril, especialmente n'El Musel, con una "amplia" rede ferroviaria, con 30 kilómetros de vía d'anchu ibéricu y métricu, "ensin cuntar el ramal de l'ampliación anguaño n'execución", y dos estaciones.

Tamién punxo en valir qu'El Musel ye "el primer cai español" en cuntar con un conveniu de conexón col ADIF.

Roqueñí tamién apostó pola necesidá de captar nuevos tráficos portuarios, por culpa de que desapaecieron los asociaos al carbón de les centrales térmiques.

Pa la presidenta de la dársena xixonesa, unu de los elementos clave nel tresporte y la loxística va ser la ZALIA, y destacó que "va xugar un papel protagonista" na cadena de valir de les mercancíes que se treslladen pel Corredor Atlánticu.

Afitó que l'Autoridá Portuaria de Xixón tien "plena disposición" pa contribuyir a que’l so desenvolvimientu "seya rápidu y sólidu".

Roqueñí tuvo tamién una mención especial pal cai de Nantes y anunció que dende l'Autoridá Portuaria yá se punxeron a trabayar pa recuperar l'Autopista del Mar col puertu de Saint Nazaire.