Uviéu refuga escluyir de les ayudes estatales a les ciudaes que nun sancionen les sos Zones de Baxes Emisiones

Ábrese un periodu de consulta pública pa que los vecinos apurran les sos idees a la ordenanza de movilidá

Uviéu refuga la midida del Ministeriu de Tresportes d'escluyir de les ayudes estatales a les ciudaes que nun sancionen de momentu nes sos Zones de Baxes Emisiones. Postura que comparte col Conceyu de Xixón.

El consistoriu uvieín va abrir a partir del llunes un periodu de consulta pública de venti díes pa que vecinos o colectivos apurran les sos idees a la ordenanza de movilidá. La Zona de Baxes Emisiones va tener un aniellu esterior, definíu pola Ronda Sur, Avenida Santander, Xeneral Elorza y Muñoz Degraín. Y otru interior, na redolada del Cascu Antiguu y El Campo San Francisco. Van tar controlaos por un centenar de cámares y llectores de matrícules, que yá se tán instalando.

Paneles lluminosos, pasos de cebra intelixentes, mididores de la calidá del aire y del ruíu y un Centru Intelixente de Movilidá na comisaría d’El Rubín, van ser otres de les midíes que van acompañar a una zona de baxes emisiones que va entrar a valir a principios del próximu añu.