Directivos d'Indra visiten El Tallerón de Duro Felguera, enantes de formalizar la so compra

Tuvieron acompañaos por un abogáu y representantes de Duro Felguera

Tres directivos de la empresa Indra visitaron esta mañana El Tallerón de Duro Felguera, enantes de cerrar la so compra. Llegaron directos dende l'aeropuertu, pasaes les 9:00 y tuvieron visitando les instalaciones y aconceyaos nes oficines hasta les 11:45.

Nel percorríu, tuvieron acompañaos por un abogáu y representantes de Duro Felguera.

Foi'l pasáu 13 de marzu, cuando'l presidente d'Indra, Ángel Escribano, anunció nuna comparecencia nel Congresu, la so intención de mercar El Tallerón, pa fabricar vehículos de combate blindaos.

Nun dio plazos, pero sí confirmó, que van incorporar a los cuasi 150 trabayadores del taller xixonés.

La operación va solliviar la situación financiera de Duro Felguera, que prorrogó'l so preconcursu d'acreedores hasta xunu.