El Gobiernu va atender les necesidaes de meyora y espansión del cai d'Avilés

El comisariáu del Corredor Atlánticu visita'l cai de Navarro

El comisariáu del Corredor Atlánticu, José Antonio Sebastián Ruiz, afirmó esti vienres que'l cai d'Avilés va ser tratáu como si formara parte de la rede básica de les terminales marítimes de la XE, lo que trai atender les sos necesidaes de meyora y espansión ensin mayor demoranza.

La Xunión Europea tien 1.189 cais, de los que namás 82 formen parte de la llamada rede básica, pero, pal Gobiernu d'España, indicó Sebastián Ruiz, el d'Avilés ye un cai importante “que necesita nueves infraestructures yá, y non nos años nos qu'Europa lo afite”.

“Poro, nós vamos tratalu como si fuera un cai de la rede básica y va tener les ayudes, les subvenciones y los proyectos d'inversión necesarios pa facer les obres necesaries en cada momentu”, indicó'l comisariáu, que visitó'l cai de Navarro acompañáu del conseyeru de Movilidá del Principáu, Alejandro Calvo, y el presidente de l'Autoridá Portuaria, Santiago Rodríguez Vega.