El Principáu deducirá hasta 500 euros nel IRPF a quien alquilen viviendes a precios asequibles

La campaña de la renta entama'l miércoles

Pa medrar el parque priváu de viviendes n’alquiler, per primer vegada habrá deducciones pa los arrendadores, tanto pa los propietarios que yá alquilen como pa los nuevos. La condición ye arrendar a un preciu asequible. La Conseyería de Vivienda trabaya na concreción nos precios de referencia que se tendrán en cuenta y mientres, aplicaráse la normativa estatal apunta Guillermo Peláez, conseyeru de Facienda, Xusticia y Asuntos Europeos.

Per primer vegada, los mozos d’hasta 35 años que s’emancipen beneficiaránse de deducciones d’hasta 2.000 euros en tolos sos gastos vitales.

Créase amás una deducción d’hasta 6.000 euros por crear una empresa o ampliar capital nuna pyme. La condición ye que nunca nun se tenga más del 40 por cientu del capital social, de mou que se beneficien pequeños inversores y emprendedores.

Otra novedá. La deducción pol cuidáu del primer fíu medra de 300 a 500 euros. La Conseyería de Facienda aconseya que se compruebe bien el borrador de la declaración pa nun perder deducciones, porque, recuerda, estes nun vienen activaes por defectu. El 2 d’abril ábrese’l plazu papresentar la declaración per Internet.