El Bancu d'Alimentos calcula que les donaciones medrarán esti añu un 30% gracies a la Llei de desperdiciu alimentariu

La Cocina Económica de Xixón aplaude la llei pa evitar el desperdiciu alimentariu

L’añu pasáu’l Bancu d’Alimentos recibió 436.000 kilos en donaciones voluntaries d’aliendos por parte de supermercaos y otres empreses del sector. Esti añu piensen algamar cerca de 560.000 kilos gracies a la nueva llei apunta Juan José Cima, secretariu del Bancu d’Alimentos.

El sector tendrá la obligación de donar los escedentes d’alimentos a entidaes sociales y bancos d’alimentos, menos que se xustifique la so inviabilidá. Nesti sen, los establecimientos de más de 1.300 metros cuadraos tendrán que roblar convenios de collaboración con organizaciones ensin ánimu d’arrequecimientu pa garantizar l’aprovechamientu de los productos en bon estáu.

Col envís d’optimizar la cadena de donación, el Bancu d’Alimentos desendolcó un programa informáticu que conecta donantes con entidaes beneficiaries.

Ente les cuestiones que queden por concretase, apunten, ta cómo se cubrirán los gastos de tresporte de los alimentos donaos. El Bancu ta a la espera de que s’asoleye la llei pa conocer la so redacción definitiva.

La Cocina Económica de Xixón aplaude la llei pa evitar el desperdiciu alimentariu

436.000 euros añales cuésta-y a la Cocina Económica alimentar a les persones en situación de vulnerabilidá. 123.000, un 28% del total, vienen de donaciones. En bona parte de les grandes superficies venceyaes al sector de l’alimentación afitaes en Xixón.

La nueva llei obliga a los establecimientos de más de 1.300 metros cuadraos a roblar convenios de collaboración coles organizaciones ensin ánimu d’arriquecimientu pa la donación de los sos escedentes. La Cocina Económica confía en qu’esto nun provoque un escesu de trámites burocráticos señala Ignacio Blanco, presidente en funciones de la Cocina Económica de Xixón.

A la espera de conocer los efectos de la nueva llei, la entidá celebra los sos 120 años d’historia. Failo mirando al futuru. Al so comedor social y les 50 persones acoyíes na so zona residencial, quier amestase un centru de día.

Planes a dos o tres años vista, que pasen por medrar les ayudes de les alministraciones y el millar de socios qu’anguaño sofiten a la institución.