El Gobiernu del Principáu decreta dos díes de lutu polos cinco muertos en Zarréu

Pedro Sánchez tresllada "un sentíu abrazu" a los familiares de les víctimes

El presidente del Principáu, Adrián Barbón, ordenó la declaración de dos díes de lutu oficial pol fallecimientu de cinco persones na esplosión d'una máquina esti llunes nel interior de la mina de Zarréu, en Degaña.

Asina lo anunció nel so perfil nes redes sociales el xefe del Executivu asturianu, quien ta de camín a Zarréu, parroquia del conceyu de Degaña asitiada nel estremu suroccidental d'Asturies, a unos 120 kilómetros d'Uviéu.

Barbón espresó'l so "más sentíu pésame" poles víctimes que dexó esti "temible accidente", qu'amás de los cinco muertos dexó a otres cuatro persones mancaes abondo.

Sobro l'accidente tamién se pronunció al traviés del so perfil en redes sociales el presidente del Gobiernu, Pedro Sánchez, treslladó "un sentíu abrazu" a los familiares de les víctimes mortales y espresó’l so deséu d'una recuperación bien llueu de los mancaos, al empar qu'agradeció'l trabayu de los servicios d'emerxencia.