Ocho inspecciones en dos años a la empresa minera nun detectaron irregularidaes

El Principáu niega actuar neglixentemente cola mina de Zarréu

El Principáu d’Asturies considera que "nunca" hubo una actuación neglixente de l’autoridá minera al respective de la mina de Zarréu, nel conceyu asturianu de Degaña, na que’l llunes pasáu morrieron cinco trabayadores y otros cuatro resultaron mancaos por mor d’un españíu.

La conseyera de Transición Ecolóxica, Industria y Comerciu del Principáu d’Asturies, Belarmina Díaz, asegurólo asina esti xueves al acabar la xunta de la Comisión de Seguridá Minera qu’aconceyó con calter d’urxencia p’analizar la traxedia, y na que s’informó de que’l Principáu va presentase como acusación particular nel casu.

Díaz fizo estes afirmaciones dempués de que se conociere qu’una empresa minera denunciare’l marzu pasáu, y un vecín de Degaña en 2023, que se taba sacando carbón de Zarréu, y de que s’asoleyare un informe internu de va dos años qu’alvertía qu’había "pruebes racionales d’una actividá estractiva non autorizada".