Cuatro mines privaes, n'activo nel suroccidente d'Asturies

Les esplotaciones dan trabayu, sobre manera, a la mocedá de la fastera suroccidental asturiana y la vecina lleonesa

Les mines de carbón actives n’Asturies son esplotaciones privaes nel suroccidente. En Cangas del Narcea ta Veiga de Rengos. En Degaña, la de Zarréu, la empresa Blue Solving tenía permisu pa investigar una futura esplotación de grafitu y desmontar vieyes estructures.

N’Ibias funciona mina Miura, onde la compañía lleonesa Carbones de la Vega diz estraer antracita d’alta calidá y en Tinéu, funciona Pilutuertu. Esplótala dende va unos cuatro años la empresa del murcianu Antonio José Boluda, NMR. Ye la empresa investigada pola desapaición de más de 120.000 tonelaes de carbón n’El Musel.

La primer esplotación en reabrir nel Suroccidente foi la de Vilares, n’Ibias. Carbones la Vega entamó a finales de 2017 llabores d’investigación y en 2020 recibía l’autorización pa la esplotación soterraña de l’antracita. El númberu de trabayadores foi medrando y, anguaño da trabayu a unes 55 persones, ente plantiya y subcontrata, esplica José María Pérez, trabayador en Carbones la Vega y delegáu sindical del SOMA-Fitag-UXT.

Producen de media unes 50.000 tonelaes al añu de la denomada antracita 'premium' y calculen que polo menos quedarán reserves pa otros ocho años de llabores d’estracción.

En Veiga de Rengos, en Cangas del Narcea, l’antigua mina de Carbonar cesó la so actividá en 2018. La compañía TYC La Mata fízose colos sos activos y opera agora la esplotación col nome TYC Narcea. Los trabayos desendólquense nuna nueva galería, con un permisu pa estracciones esperimentales pa la siderurxa y da trabayu a unes 50 persones.

La tercer mina ye la de Pilutuertu, en Tinéu. Alredor de 60 persones trabayen nesta esplotación. El so titular sigue siendo Uminsa, pero esplotada por NMR, dempués d’un alcuerdu col empresariu mineru Victorino Alonso.

Les mines vuelven a dar trabayu na fastera, pero con unes condiciones, señalen los sindicatos, que poco tienen que ver coles d’otros tiempos, señala Beatriz Egido, secretaria xeneral de la Xunión Comarcal de CCOO Surocidente.

Los niveles de trabayu nada tienen que ver colos de décades pasaes, cuando llegó a haber más de 3.500 trabayadores directos na fastera. Tampoco los salarios.

Les tres esplotaciones dan trabayu, sobre manera, a la mocedá de la fastera suroccidental asturiana y la vecina lleonesa. Una oportunidá llaboral, señalen, nuna zona onde nun hai muches opciones.