‘Gaseosas Muralla’, un referente n’A Veiga

Jesús Soto recupera la fábrica como homenaxe a los sos antepasaos

‘Gaseosas Muralla’, la última fábrica de gaseosa en zarrar n’A Veiga lluz anguaño con una imaxe envidiable. El güelu de Jesús Soto abrióla en 1908 y d’ella salíen cientos de botelles enllenes d’un llíquidu burbuxeante que güei perdió munchu fuelle, pero qu’entá resiste a finar.

Ente botelles de colores y máquines mui especiales, Jesús crióse en contactu con un oficiu qu’heredaría años más tarde so madre y que tamién sedría’l sustentu económicu de Jesús tiempu dempués.

Jesús mantuvo la esencia de la gaseosa munchos años. Compatibilizó esta responsabilidá col so trabayu de profesor de tecnoloxía. De fechu, usaba munchos d’estos inxenios nel día a día de la docencia.

Nos años 80 tuvo que zarrala porque cada vegada yera más difícil compatibilizar dambos trabayos, pero va tiempu decidió recuperar la instalación y convertila nun homenaxe a los sos antepasaos y al oficiu de los creadores de gaseosa.

Güei puen alcontrase botelles de dellos sieglos, pieces úniques que conserva de los entamos de la fábrica, pero otres que compró nel estranxeru p’arriquecer un llugar que pa él ye máxicu.

Suso entá s’emociona cuando fala de la so fábrica. Emociónase cuando s’alcuentra con una botella de gaseosa de tola vida. Más qu’un negociu, ‘Gaseosas Muralla’ foi n’A Veiga tou un referente.