'Asturs Best Berries' fixa población na aldega de Ventoso, en Santalla d'Ozcos

Unu de los plantíos d'arándanos más grandes d'Os Oscos

En plenu pulmón d'Os Oscos, na aldega de Ventoso, nacía en 2017 unu de los plantíos d'arándanos más grandes del occidente, con ocho hectárees.

Un proyectu familiar, 100% ecolóxicu y respetuosu col mediu ambiente que, amás de producir arándanos, buscaba afitar población. Nel branu emplega a 11 persones nun pueblu que malapenes llega a la ventena d'habitantes.

D'equí salen al añu 40 tonelaes d'arándanos. Toos escoyíos de manera artesanal, unu a unu, esplica Ubaldo González, copropietariu de 'Asturs Best Berries'.

'Asturies Best Berries’ xestiónase con plaques solares y agua de lluvia. Equí hai cinco variedaes d'arándanos. Nestos momentos comercialícense dos d'elles.

Piensen, inclusive, en dar el saltu más p'alantre al comerciu internacional. La calidá del arándanu anguaño ye bien bona, pero inda podía ser meyor. L'ausencia de sol y les fuertes lluvies tórguenlo.

La empresa ta dirixida por cinco socios, toos amestaos a esta redolada de Santalla d'Ozcos. A pesar de que los entamos nun fueron cenciellos, la resultancia foi bien satisfactoria.

A la inmensa variedá de productos que salen de la contorna d'Os Ozcos hai que xunir unu más, l'arándanu cultiváu con mimu y recoyíu con procuru, pa que llegue nes meyores condiciones a tolos llares.