'L'Edificiu de Precios Únicos' construyóse n'Avilés nel añu 1952

L'inmueble agospiará pisos de lluxu nel centru la villa

'L’ Edificiu de Precios Únicos' construyóse n’Avilés nel añu 1952 n’El Parche. Nel llateral derechu del Ayuntamientu d’Avilés, faciendo esquina coles cais de La Ferrería, Rui Gómez y Rivero.

Conozse popularmente como 'L’Edificiu de Precios Únicos' porque nel so baxu comercial funcionó delles décades el primer gran bazar de la ciudá, asegura Gerardo González, responsable n’Asturies del grupu Horizonte, propietarios del edificiu.

Un negociu que baxó la persiana en 2005 y que destacaba por tener de too y polos sos escaparates qu’arrodiaben l’edificiu y yeren reclamu de reciella y mayores.

Esti edificiu foi de lluxu na so construcción y agora foi compráu pol grupu Horizonte, perteneciente al presidente del Real Avilés Industrial, pa rehabilitar dafechu y convertilu en pisos de lluxu que yá se tán comercializando, esplica Laura Fernández, axente comercial del 'Edificiu Pelayo'.

Dende agora llevará’l nome de 'Edificiu Pelayo' n’honor al fíu del actual propietariu, Diego Baeza. Les obres de rehabilitación quieren entamase dempués del branu.

Per dientro fadráse una reforma total, pero caltendráse la fachada intacta coles sos abondes ventanes y con unos balcones, con vistes privilexaes al corazón del cascu históricu d’Avilés.