'Nano'l de Waikiki', pioneru del surf na contorna oriental asturiana

Fai más de 30 años montó la primer tienda y escuela de surf de Ribeseya

Fernando Rodríguez Quesada, 'Nano'l de Waikiki', lleva toa una vida venceyada al mundu del surf. Empezó a esbariar peles foles de les sableres ribeseyanes fai agora mediu sieglu. Foi nel añu 1971, cuando esti veraneante madrilanu con raigaños asturianos, traxo les primeres tables a les sableres de Ribeseya y formó'l primer grupu de surf de la contorna oriental asturiana.

Entós daquella, la cultura del surf empezó a popularizase per tola mariña cantábrica, de Biarritz, en Francia, a Galicia. Les conocencies d'esti apasionáu del surf inda yeren mui poques pa practicar unu de los deportes acuáticos más complicaos y esixentes.

La casualidá fixo que, per aquel branu de 1971, apaecieren unos hippies australianos esbariando peles foles de la sablera de Vega como auténticos surferos.

En 1984, Nano entamó a fabricar les sos primeres tables de surf, garrando conocencies de los sharper más prestixosos del mundu nel diseñu y la creación de nueves tables. Un taller asitiáu cabo la sablera de Santa Marina, pela que tamién acostumen a pasar surferos de tol país pa reparar les sos tables nos meses del branu.

A finales de los 80 del sieglu pasáu, Nano entamó a distribuyir material de surf pel norte d'España, lo que lu llevó a montar la so propia tienda nos años 90, fai agora más de tres décades, cola ayuda de la so muyer. Ye un local con un espaciu bien amenorgáu, pero con un encantu h.awaianu de lo más peculiar.

Nano cumplió apocayá los 67 años, pero sigue siendo unu de los locales avezaos de la sablera de Santa Marina los díes más templaos del branu.​