'Pepe'l de Tuenes' pasó 33 años trabayando na mina

El vecín de Bimenes llamenta'l fin del carbón n'Asturies

Si a José Montes-y dicen na so mocedá que llegaría a vieyu, tomaríalo a chancia. Porque esti incombustible yerbatu nun lo tuvo precisamente fácil na so llarga vida. Entró na mina siendo malapenes un neñu y pasó 33 años desempeñando distintos llabores so tierra.

Güei fuelga, tranquilamente, na so casa de Melendreros, pero a puntu de cumplir los 90 años entá caltién frescos, guardaos na memoria, los sos entamos na mina.

Como picador trabayó en Mosquitera y L'Entregu, onde se xubiló. Pero too entamó na pequeña mina sierense de Les Llamargues, a la que diba caminando los más de 15 kilómetros que dixebren el so pueblu natal, Tuenes, de Valdesoto. Salía tan ceo qu'entá yera de nueche.

En plena posguerra, Montes vivió una dómina onde la seguridá na mina amenorgábase, poco menos, qu'a tar alerta y cruciar los deos.

Xunto a la so muyer Milagros criaron tres fíes y un sobrín col entós escasu xornal de mineru, combináu coles hores estra na güerta y el cuidáu de los animales. Una vida dura y ensin horarios marcada pol esfuerzu y la modestia.

Sicasí, y pese a les dificultaes, güei llamenta'l fin del carbón n'Asturies. Como él, cientos de families de Bimenes salieron a flote gracies al mineral, ente ellos so padre y tolos sos hermanos varones.

Güei José Montes 'Pepe'l de Tuenes' ye yá'l postrer mineru vivu d'esta estirpe.