Naz la primer bodega del conceyu d'Ibias

La tradición y les técniques modernes danse la mano

Naz la primer bodega del conceyu d'Ibias. Ta asitiada en Santantolín, y nella la tradición y les técniques modernes danse la mano. Ye'l proyectu de Víctor Méndez, que tres proveer a la DOP la so uva, decidió dar el pasu a la producción del so propiu vinu, que s'inxertará na Denominación d'Orixe Protexida del suroccidente asturianu.

Recuerdos d'infancia, amor a la tierra y conservar los raigaños, son razones de pesu pa esti proyectu qu'espera animar a otros a rellanzar la empresa vinícola nesti rincón del suroccidente. Unes 450 botelles de "oru d'Ibias" que yá buscaron el so sitiu nel mercáu.

Tres espacios diferenciaos pa cada fase de producción y qu'acaba nesta sala de cates. En roca escavada, y conservando la so autenticidá lo más posible, faise esti vinu blanco.

Esta inauguración ye'l preludiu a la Fiesta del Vinu d'Ibias, que se fadrá'l viniente sábadu 15 d'abril, y na que se podrá prebar el caldu d'esta bodega. Sobre seguru camina'l so propietariu pa en tres años medrar la producción, y apostar más p'alantre por facer tintu autóctono.