A Veiga apuesta pol comerciu de proximidá

Cerca de la metá de los trabayos del conceyu tán dientro del sector terciariu

Cerca de la metá de los trabayos del conceyu d’A Veiga tán dientro del sector terciariu. El comerciu foi históricamente unu de los grandes sustentos d’A Veiga. La feria de muestres ye unu de los grandes revulsivos, pero’l pequeñu comerciu supo caltener nos últimos años el tirón de tiempos pasaos.

Son cientos les persones que cada sábadu baxen de zones como Os Ozcos o Taramundi pa mercar nel mercáu. Los vecinos de la contornada apuesten por un comerciu de proximidá, un eventu del que tamién s’aprovechen bares y restauranes.

El comerciu de la villa ye consciente de la so importancia y de la necesidá de siguir mimando al veceru. Fáilo con sorteos como’l de Navidá, onde se ponen en xuegu 4.000 euros en vales de compra. Internet y les grandes árees comerciales supunxeron un duru golpe equí, como n’otros conceyos, pero’l texíu empresarial supo salvar el temporal y siempres ta sollerte.

El sector secundariu y el de la construcción representen un 15% del total. Dalgunes pequeñes empreses afitáronse va unos años nel polígonu de Monxardín y anguaño algamaron una bona viabilidá.

Hai que destacar tamién l’actividá agraria y ganadera. Les más de les esplotaciones del conceyu dedíquense al ganáu vacuno, con una orientación venceyada al sector de la lleche.