A Veiga tien requexos de gran valir históricu y paisaxísticu

Les aves migratories y la Selmana Santa, focos d’atracción de visitantes

A Veiga ye’l conceyu de los ríos. El Monxardín y el Suarón atraviesen la villa y desemboquen directamente nel Eo, formando una marisma mui característica.

Hai inclusive una sienda, la de les 12 pontes, que percuerre esti entornu. La gran riqueza mediu ambiental y paisaxística atrái a esti llugar a cientos d’amantes de les aves migratories.

Unu de los grandes proyectos del conceyu pasa por recuperar dalgunes d’estes zones más estrozaes, una rexeneración tamién no visual.

El niciu metalúrxicu d’A Veiga alcontrámoslu en Meredo, nel so mazu del sieglu XVIII y que, anguaño, ta zarráu al públicu. Busquen la forma de xestionalu de cara al turismu, pero tamos énte una ayalga etnográfica y paisaxística de primer nivel. La ferrería foi comprada polos ascendientes de la familia Villamil en 1714 y foi remocicada en 2003 pol consistoriu veigueñu.

Otro d’esos requexos enllenos d’historia ye’l so vieyu caleru La Sorpesa, un fornu de fabricación de cal que dexó de funcionar va más de mediu sieglu. Güei preside una de les entraes a la villa. El so últimu propietariu foi Fernando, que lu usó pa guardar material d’una carpintería. Unu de los obreros que lu construyó foi so güelu.

En Piantón tamién alcontramos otru d’esos requexos fundamentales a la hora de visitar A Veiga, la ilesia y la so peculiar plaza atraen a cientos de visitantes. La so Selmana Santa ye, amás, referente na contornada.