Adriana Lastra entama la llista de delegaos asturianos al Congresu Federal

La FSA pacta una llista consensuada que respeta'l porcentaxe de les primaries

La diputada nacional del PSOE Adriana Lastra afirmó güei que "lleguen nuevos tiempos" al partíu y que la so corriente, afín al nuevu secretariu xeneral, Pedro Sánchez, nun tien intención de "persiguir a naide" por apostar por otru candidatu nes primaries.

Lastra entama la llista que'l Congresu Estraordinariu de la FSA-PSOE aprobó güei, con un 69,42% de sofitos, pa escoyer a los 45 delegaos qu'asistirán al 39 Congresu Federal del PSOE, que se celebrará en Madrid los próximos 16, 17 y 18 de xunu, y que respeta la proporcionalidá del resultáu de les primaries.

La llista da 24 delegaos a los partidarios de Pedro Sánchez, 18 pa los que respaldaron la opción de Susana Díaz y tres pa los que sofitaron a Patxi López.

La candidatura de los socialistes asturianos foi votada por 242 delegaos, el 99,59 por cientu del censu d'un total de 243 delegaos acreitaos y con derechu a votu.

Un total de 168 votos fueron cuantificaos como válidos (69,42 por cientu), 49 votos fueron en blanco (20,25 por cientu) y 25 nulos (10,33 por cientu)

Amás de Lastra, la llista ígüenla, ente otros, el secretariu xeneral del SOMA-FITAG-UXT, José Luis Alperi; la senadora María Luisa Carcedo, y los alcaldes de Llaviana, Adrián Barbón y d'Uviéu, Wenceslao López.

Tamién tán na llista, el voceru del PSOE na Xunta Xeneral, Fernando Lastra; el conseyeru de Presidencia, Guillermo Martínez, y los diputaos rexonales Dolores Álvarez Campillo, Marcelino Marcos Líndez, Carmen Eva Pérez, Elsa Pérez y Margarita Vega, amás de l'alcaldesa de Carreño, Amelia Fernández.

Na llista unitaria aprobada güei pola FSA ta'l director xeneral de Deportes del Principáu, Ramón Tuero, y destaca la non inclusión del actual secretariu xeneral d'Organización, Jesús Gutiérrez.

El trabayu nes tres comisiones constituyíes permitió sacar alantre les 86 enmiendes presentaes dende la candidatura de Pedro Sánchez.

Ente'l sector sanchista asturianu dan especial relevancia a la que tien que ver col modelu de partíu.

Na enmienda aprobada apuéstase por un PSOE más participativu nel que la militancia tome partíu na toma de decisiones más importantes, hasta nos alcuerdos de futuros gobiernos.

Eses 86 enmiendes vendrán a completar el documentu marcu pal congresu federal que ficiera la comisión xestora que preside Javier Fernández.