Alcoa caltién el testu entregáu a los sindicatos

Da de plazu hasta’l domingu pa dar la so aprobación

Alcoa caltién el testu del acta de finalización de les negociaciones, qu’entregó ayeri a los sindicatos, a los que-yos dio de plazu hasta’l domingu pa dar la so aprobación, dixeron esti xueves fontes averaes a les negociaciones.

El documentu cuenta col sofitu de cuasi toles partes, incluyíos los abogaos de CCOO a nivel estatal, anque sigue ensin el preste del comité d’empresa d’Avilés.

El documentu, fundamental pa que la sede d’Alcoa nos Estaos Xuníos dea lluz verde al procesu de venta de les plantes de la compañía n’A Coruña y Avilés, constitúi un acta de finalización del procesu que redacta la comisión negociadora del espediente de despidu colectivu y la comisión de siguimientu.

Les mesmes fontes espliquen que nun descarten que si los sindicatos nun acepten el testu y nun se vuelve a ampliar el plazu más allá d’esti domingu -daqué que podría tratase na xunta d’esta tarde- l’ERE podría facese’l llunes viniente.